2025 жылғы 14 наурызда «QazBioPharm Ұлттық холдингі» АҚ-да Қазақстан Республикасының Экология және табиғи ресурстар министрі Ерлан Нысанбаевпен жұмыс кездесуі өтті.

Іс-шараға Президент Әкімшілігінің, Экология және табиғи ресурстар министрлігінің өкілдері, Холдингтің жетекші ғалымдары, сондай-ақ «Ә. Бөкейхан атындағы Қазақ орман шаруашылығы және агроорман мелиорациясы ғылыми-зерттеу институты» ЖШС Басқарма төрағасы қатысты.

Талқылау барысында өсімдіктердің неғұрлым тұрақты тұқымдарын өсіру, Арал теңізінің құрғаған түбін көгалдандыру, жасыл белдеу құру, сондай-ақ фитопатологиялардың таралуын болдырмау шаралары мәселелері қозғалды. Генетикалық инженерия мүмкіндіктеріне және құрғақшылық пен топырақтың тұздануына төзімді дақылдарды құруға ерекше назар аударылды.

Холдингтің бас директоры Ерғали Әбдірайымов ғылым, өндіріс саласындағы қызметтің негізгі нәтижелері мен жетістіктерін, сондай-ақ биопрепараттар өндірісін кеңейту жоспарын ұсынды.

Кездесуде Ұлттық биотехнология орталығының мамандары экожүйелерді қалпына келтіруге бағытталған биотехнология саласындағы озық әзірлемелер мен зерттеулерді көрсетті. Генетикалық инженерия мүмкіндіктеріне және құрғақшылық пен топырақтың тұздануына төзімді дақылдарды құруға ерекше назар аударылды.

Талқылаулардан кейін делегация Ұлттық биотехнология орталығының зертханалары мен жылыжайына барып, өсімдіктердің селекциясы мен гендік инженериясы саласындағы соңғы әзірлемелерімен танысты.

Экология және табиғи ресурстар министрі Ерлан Нысанбаев ғылым мен мемлекеттік құрылымдардың ынтымақтастығы экологиялық міндеттерді шешуде және тұрақты табиғат қорғау стратегияларын қалыптастыруда шешуші рөл атқаратынын атап өтті.

Қазақстан Республикасы Президентінің ғылым және инновациялар жөніндегі кеңесшісі Күнсұлу Закария Холдингтің ғылыми әлеуетінің жоғары екенін атап өтіп, тек зерттеулер жүргізіліп қана қоймай, олардың іс жүзінде қолданылып жатқанын да айтты. Сондай-ақ халықаралық әріптестік, озық технологиялармен алмасу және үздік тәжірибелерді енгізу қажеттілігіне назар аударды. Қазақстан өңірлерінде білім мен біліктілік беру мәселелері талқыланып, бұл ғылыми жетістіктерді кеңінен қолдануға және саланың дамуына ықпал ететіні айтылды.

Кездесу қорытындысы бойынша тараптар экология және биотехнология саласында одан әрі ынтымақтастыққа дайын екендіктерін білдірді. Қатысушылар қоршаған ортаны қорғау және экожүйелерді қалпына келтіру жөніндегі мемлекеттік бағдарламаларға ғылыми әзірлемелерді енгізу қажеттігін атап өтті.