27–28 қараша күндері Астанада «Жаһандық қауіп-қатерлер жағдайындағы биологиялық қауіпсіздік: қарсы іс-қимылдың ғылыми-технологиялық тәсілдері» атты халықаралық конференция өтті. Іс-шараны «QazBioPharm» АҚ ұйымдастырды. Конференцияға Қазақстан, Франция, Қытай, Ресей және Қырғызстанның мемлекеттік органдары, ғылыми орталықтары мен халықаралық ұйымдарынан 300-ден астам маман қатысты.

Конференция барысында биологиялық қауіпсіздіктің негізгі сын-қатерлері, диагностикадағы заманауи тәсілдер, жаңа буын вакциналарын әзірлеу және микроорганизмдердің дәріге төзімділігін еңсеру мәселелері талқыланды. Бағдарламаға эпидемиологиялық және эпизоотиялық жағдайды мониторингілеу, инфекциялардың алдын алуға арналған диагностикалық құралдар мен технологияларды әзірлеу, сондай-ақ микроорганизмдердің дәріге төзімділігі проблемалары бойынша 4 секция енгізілді.

Негізгі оқиға ретінде «Биологиялық қауіпсіздік» консорциумының үш жылдық бағдарламасының қорытындылары ғылымды қажет ететін өнімдер көрмесінде таныстырылды. Диагностикалық тест-жүйелер, вакциналық платформалар, дәрілік препараттар және технологиялық шешімдер ұсынылды.

Қазіргі уақытта Холдинг құрылымы шеңберінде гранттық қаржыландыру аясында 12 ғылыми-техникалық бағдарлама және 77 жоба іске асырылуда.

Соңғы жылдары ғалымдар 300-ден астам ғылыми жарияланым шығарды. Бүгінгі таңда 156 қолданыстағы патент және денсаулық сақтау мен ветеринария практикасында енгізуге дайын 53 өнім түрі жүзеге асырылуда.