1948 жылы 15 шілдеде Қазақ КСР, Батыс Қазақстан облысы, Тайпақ ауданы, Қурайлысай кентінде дүниеге келген.

1972 жылы Қарағанды мемлекеттік медицина институтын санитарлық-гигиеналық факультеті бойынша бітірген.

Кеңес Сәрсенғалиұлы — медицина ғылымдарының докторы (2006 ж.), Халықаралық Жаратылыстану ғылымдары академиясының (МАНЭБ) академигі (2003 ж.), эпидемиология және денсаулық сақтауды ұйымдастыру бойынша жоғары санатты дәрігер, М. Оспанов атындағы БҚММУ Құрметті профессоры.

Еңбек жолы:

1972–1985 жылдары — КСРО Денсаулық сақтау министрлігінің Орал обаға қарсы стансасының Жәмпейті обаға қарсы бөлімшесінде дәрігер, Ақтөбе облыстық санитарлық-эпидемиологиялық стансасының аса қауіпті инфекциялар бөлімінің дәрігер-эпидемиологы, Ақтөбе облыстық денсаулық сақтау бөлімінің бас эпидемиологы болып жұмыс істеді.

1985–2002 жылдары — Республикалық санитарлық-эпидемиологиялық стансасының дәрігер-эпидемиологы, аса қауіпті инфекциялар бөлімінің меңгерушісі және бас дәрігерінің орынбасары.

2002–2009 жылдары — ҚР Денсаулық сақтау министрлігінің Республикалық санитарлық-эпидемиологиялық қызметінің бас дәрігері.

2009–2011 жылдары — ҚР Денсаулық сақтау министрлігінің Мемлекеттік санитарлық-эпидемиологиялық қадағалау комитетінің төрағасы және ҚР Бас мемлекеттік санитарлық дәрігері.

2012–2018 жылдары — Санитарлық-эпидемиологиялық сараптама және мониторинг ғылыми-практикалық орталығының Астана қаласындағы филиалының директоры және ҚР Денсаулық сақтау министрлігінің Санитарлық-эпидемиологиялық сараптама және мониторинг ғылыми-практикалық орталығы директорының кеңесшісі.

Ғылыми қызметі:

Аса қауіпті инфекциялардың алдын алу және олармен күресу шаралары, сондай-ақ Қазақстан Республикасының шекарасын санитарлық қорғау салаларындағы отандық және шетелдік ғылыми басылымдарда жарияланған 2 монографияның, 2 оқулықтың, 15 әдістемелік ұсынымның және 200-ден астам ғылыми жарияланымның авторы және қосалқы авторы. Халықаралық және республикалық ғылыми-зерттеу жобаларына қатысқан, санитарлық-эпидемиологиялық қауіпсіздікті қамтамасыз ету бойынша нормативтік құжаттарды әзірлеуге елеулі үлес қосқан.

Марапаттары:

«Қазақстан Республикасы денсаулық сақтау ісінің үздігіне» төсбелгісі (2000 ж.).

«Ерен еңбегі үшін» медалі (2005 ж.).

Мерейтойлық медальдар мен ҚР Денсаулық сақтау министрінің Құрмет грамотасы (2006 ж.).